DIESEL 76 hett dat Thema CHINA, maal heel wat anners.
Man as alltied ok vööl Narichten ut de oostfreeske Kultur, un ‘n Rieg exten ok van heel neje Schrievers.
Nu weest man eerstmaal blied mit de D 76, man geern hebben wi BReven un Texten van jo, de Lesers – för de wi dat Bladd ja maken.
Diesel is siet 1993 al in ‘t Internet vertreden, domaals wall, sünner dat een dat sehn hett, dat was noch de Anfangstied van Internetwark. Good.
Over de Jahren hen hett sük ok de Grafik ännert, un dat, wat ‘n Websied könen mutt. Nu, Märt 2011, hebben wi ‘n groten Stapp vörgels maakt.
‘t lett nu heel mooi (menen wi), man de Inhalten mutten d’r nu sachs ok in. Dat is Wark. Dat bruukt Tied. Elke Dag word ‘t beter.
Daarum lohnt dat ok, elke Dag even to kieken…
Hermann-Eberhardt, pixelio.de
Jan steiht to luurn
spaa in d’ eer
een hand an d’ spaa
de anner in de büxentaske
smitt he up
of smitt he nee up?
se hebben hör tieden
‘smörgens um halv veer
vörmiddags um halv negen un halv elven
denn namiddags noch ‘n maal um halv dree
daar röögt sük wat!
nee, doch neet
de düüvhenker brengt de hele tuun up unstee
in d’ mollacker geiht ‘t an besten
in ‘t gras is ‘t al slechter
man nu is ‘t so wied
tosteken van achtern
hooghalen un gau een vör de kopp
dat was ‘t
de deit keen undöög mehr
waarhen daarmit?
man so up d’ messfolt smieten
vörher, in de schofel tieden
as dat ok so vööl arbeidslosen gaff
nee, do wurr nix wegsmeten
do stunnen de mannlüü
um halv veer up d’ acker
un wenn de hahn för ‘t eerste maal kraihen dee
harren se al ‘n stück of fiev kold maakt
de wurm utnohmen
un dat fell up ‘n bredd spiekert to drögen
in Emden gaff dat Jöden
daar kreegst för ‘t stück ‘n mark
dat was do ‘n heel bült geld
mullen gifft dat vandaag bi uns immer noch
un arbeidslosen ok
man Jöden?
Ok dit Gedicht steiht in dat Book “De 100 moiste oostfreeske plattdüütse GEdichten”, DIESEL Verlag 2008. Un en Interpretation is natolesen in de Tiedschrift Ostfriesland-Magazin, SKN Nörden.
Fooke Hoissen Müller:
Iesvermaak
Blix, Jungens, upgesett! Halloh?
Sleev, de sük nögen lett! Man to!
De kleen un kregel is, vöran
Un achter up de Flögelmann,
Denn bunte Rieg un elk sien Deern.
Se tiert* sük, man se deit et geern.
Schaakt* jo de Schöfels liek! Süh so!
Nu, Kinner, all togliek! Man to!
Striekt ut, vöran dat beste Been;
De swieren* will, de loop alleen.
Hier gellt keen junkerlik Getier*.
Hold Streek! Dat is de Böskupp hier.
Schelm, de d’r Küten* hett. Woso?
Un doch sük slepen lett. Süh so!
Jung Fentjes, noch in ‘t Krüüz wat swack,
Oll Basen, all wat dick un spack*,
De fixe Keerl, de tedre* Maid:
Elk deit suien Best, dat geiht, dat geiht!
Huus, Polder, Kroog of Kark. Ho ho!
Eendracht maakt blied un stark. Süh so!
Wat enkelt löppt, geiht dwars un dweer
Un kann nich tegen Wind un Weer.
Wi seilen stevig all togliek
In d’ Kroog, in ‘t Bitt*, in ‘t Hemelriek.
*) Bitt = Loch im Eis
*) Küten = Waden (hier wohl: kräftige …)
*) schaken = (hier:) klopfen
*) spack = hinfällig
*) swieren = schwingend Schlittschuh laufen
*) teder = fein, zart, zierlich
*) (sük) tieren = s. zieren >> Getier
Wahrt jo, mien gode Mann! Halloh!
Nich so liek to liek an! Süh so!
Hebb ji jo Plaats för jo alleen?
De Iesbahn is för elk un een.
Köönt ji nich delen halv un halv,
Denn gaht to School mit Bigg un Kalv.
Stopp! Hier ‘s dat „Golden Schipp“. Halloh!
Koomt rin un drinkt en Drüpp. Man to!
De good to Been un flink un fix,
De pleistert* geern, dat deit hum nix.
En Koppke Tee un ‘n Stoov mit Füür,
Denn seggt jo Froo nich „’t is to düür“.
Riegt jo! Un schweiget still! Ho ho!
Horcht, was ich fragen will. Hört to!
Ein Prachtsalon mit Schein und Glanz,
Geschraubtem Witz und steifem Tanz,
Of Iesvermaak för Froo un Mann,
Wat steiht Oostfresen beter an?
Heel sünner Tegenspraak. Juchhe!
Vivat dat Iesvermaak! Juchhe!
*) pleistern = sich ausruhen, auffrischen
Ok dit Gedicht steiht in dat Book “De 100 moiste oostfreeske plattdüütse Gedichten, rutg. v. C.H.Dirks, Diesel Verlag.
Un dit un vööl anner Gedichten van Müller in sien groot Gedichtenbook.
Hans-Hermann Briese
Dröömwelt
De Tuun mit Kaskaden
Van vöölklören Bougainvilleen
Prachterg Fielappers fluttern
Um en Busk van Oleander
En gröne Heeg
Mit rode, gele, lila Blössems
Van Hibiskus
Goldfisken deep unner
En sülvern Waterspegel
Bunte Papageien hoog unner
En Kuppel van Glas
Daar achter Daakland wied
Dat Gedicht lett eerst heel eenfack: unner en Glaskuppel, in en glasen Kuppel is anschienna dat Paradies, un buten dat Daakland, natt un kold un gries. Man bi ‘t nahder BEkieken kunn dat ok nett annersum wesen…
Dat Gedicht steiht in dat Book “De 100 moiste oostfreeske plattdüütse GEdichten”, Diesel Verlag. Un CArl-HEinz DIrks hett dat mooi interpreteert in OSTFRIESLAND MAGAZIN 1 / 2011, in de Riege “Dat mooiste Gedicht”
